ရန်ကုန်၊ ဒီဇင်ဘာ (၂၈)
ပဲခူးတိုင်းဒေသကြီး၊ ညောင်လေးပင်ခရိုင်၊ ကျောက်ကြီးမြို့နယ်၊ မူသယ်ဒေသ မှာ စစ်ကောင်စီတပ်ဖွဲ့ဝင်တွေက တပ်အင်အားတိုးချဲ့နေလို့ ပြီးခဲ့တဲ့ ဒီဇင်ဘာ (၂၁) ရက်နေ့ကစတင်ကာ ဒေသခံပြည်တွေ ထွက်ပြေးတိမ်းရှောင်နေရပြီး စားဝတ်နေရေး အခက်အခဲမျိုးစုံနဲ့ ရင်ဆိုင်နေရတယ်လို့ ကရင်အမျိုးသားအစည်းအရုံး KNU ဆီက သိရပါတယ်။
အာဏာသိမ်း စစ်ကောင်စီဟာ စစ်ရေးလှုပ်ရှားမှုနဲ့ အင်အားတိုးချဲ့မှုတွေ ပိုမိုပြုလုပ်လာတဲ့အတွက် မူသယ်ဒေသမှာ ကရင်အမျိုးသားလွတ်မြောက်ရေးတပ်မတော် KNLA ၊ ကရင်အမျိုးသားကာကွယ်ရေးတပ် KNDO တို့ကြား မကြာခဏ တိုက်ပွဲတွေ ဖြစ်ပွားနေပါတယ်။
စစ်ရေးလှုပ်ရှားတာ နဲ့ စစ်အင်အားတိုးချဲ့တာတွေကို ပြုလုပ်လာတဲ့ တပ်တွေက တပ်ရင်းမှူး ရှမ်းလေးအောင် ဦးဆောင်တဲ့ ခလရ – ၃၅၁ ၊ တပ်ရင်းမှူး စိုးဇော်ထွန်း ဦးဆောင်တဲ့ ခလရ – ၁၂၄ ၊ တပ်ရင်းမှူး ထိန်လင်းအောင် ဦးဆောင်တဲ့ ခလရ – ၅၈၉ ၊ တပ်ရင်းမှူး လှိုင်ညို ဦးဆောင်တဲ့ ခလရ – ၅၉၈ ၊ ခလရ – ၄၄၀ ( ဦးဆောင်သူမသိ ) နဲ့ ဇော်ဇော်နိုင် ဦးဆောင်တဲ့ ခမရ – ၇၅ တို့ဖြစ်ပြီး သူတို့ရဲ့ တပ်ရင်း (၆) ရင်းကို ဗျူဟာမှူး မင်းထင်အောင် ကနေ ဦးစီးကွပ်ကဲနေတာဖြစ်ပြီး စုစု ပေါင်း အင်အား (၄၈၀) နီးပါးရှိတယ်လို့ KNU က ထုတ်ပြန်ထားပါတယ်။
အာဏာသိမ်း စစ်ကောင်စီရဲ့ စစ်ရေးလှုပ်ရှားတဲ့ နေရာတွေက မူသယ်ဒေသ အနီးအနား ကားလမ်း တစ်ဖက်က ကျေးရွာတွေဖြစ်ပြီး ပေါ်ဖေါခီး၊ စေးဘောလူ၊ ထီးပနာအေခီး၊ ခယ်ခိုကာ နဲ့ သေနွယ်ထာ ( ခေါ် ) မူသယ် စတဲ့ ကျေးရွာတွေ ပြည်သူတွေ ထွက်ပြေးတိမ်းရှောင် ပုန်းအောင်းနေရတာ ဖြစ်ပါတယ်။
ပြီးခဲ့တဲ့ ဒီဇင်ဘာလ (၂၃) ရက်နေ့ကလည်း အကြမ်းဖက်စစ်ကောင်စီတပ်တွေဟာ မော်တော်ယာဉ် (၁၂) စီး ပေါ်ကို စားနပ်ရိက္ခာတွေ နဲ့ မြင်းအကောင်ရေ (၁၀၀) နီးပါးကို တင်ဆောင်ပြီး သံဘို ကနေ မူတြော်ခရိုင် ကို ပို့ဆောင်ခဲ့ပါသေးတယ်။