ရန်ကုန်၊ ဒီဇင်ဘာ(၂၉)
PDF တွေဟာ (၇) လလောက်ပဲလေ့ကျင့်ချိန်ရခဲ့တာတောင် တိုင်းရင်းသားလက်နက်ကိုင်တွေရဲ့ကူညီပံ့ပိုးမှု၊ ပူးပေါင်း ဆောင်ရွက်မှုတွေနဲ့ နှစ် (၇၀) သက်တမ်းရှိတဲ့ အကြမ်းဖက်စစ်ကောင်စီ နဲ့ ယှဉ်ပြိုင်တိုက်ခိုက်နိုင်အောင် စွမ်းရည်တိုးတက်လာတာ နေ့စဉ်အကြမ်းဖက် စစ်ကောင်စီတွေရဲ့ ကျဆုံးစာရင်းကိုကြည့်ရင်သိနိုင်တယ်လို့ ပြည်ထောင်စုဝန်ကြီးချုပ် မန်းဝင်းခိုင်သန်း က ပြောဆိုလိုက်ပါတယ်။
တော်လှန်ရေးကာလမို့ အရင် ဒီမိုကရေစီ ခေတ်အစိုးရလို လုပ်တာကိုင်တာမှန်သမျှ ပွင့်လင်းမြင်သာစွာချပြလို့ မရတဲ့အခြေအနေမျိုးမှာရှိနေပြီး စစ်ရေးကဏ္ဍတွေဆို လျှို့ဝှက်စွာလုပ်ဆောင်ရမယ့် ကဏ္ဍတွေဖြစ်သလို chain of command ကလည်း အင်မတန်အရေးကြီးတယ်လို့ အမျိုးသားညီညွတ်ရေးအစိုးရ အဖွဲ့ အစည်းအဝေးမှာ သူက အခုလို ပြောဆိုခဲ့တာ ဖြစ်ပါတယ်။
နိုင်ငံတကာ အနေနဲ့လည်း အကြမ်းဖက်စစ်ကောင်စီ ရဲ့ အပြစ်မဲ့ပြည်သူတွေကို အခုလို ရက်စက်ကြမ်းကြုတ်မှုတွေ ပြုလုပ်နေတဲ့အပေါ် ဒီထက်ပိုမို ထိထိရောက်ရောက် နည်းလမ်းတွေနဲ့ ကူညီပံ့ပိုးပေးဖို့ ပြည်ထောင်စုဝန်ကြီးချုပ် မန်းဝင်းခိုင်သန်း က တောင်းဆိုခဲ့ပါတယ်။
အကြမ်းဖက်စစ်ကောင်စီ အယောက် (၂၀) ကျလို့ ကျနော်တို့ရဲ့တိုင်းရင်းသား EAO တွေ၊ PDF တွေတယောက် ကျဆုံးတာမျိုးမခံနိုင်ပါဘူး ကျနော်တို့ပြည်သူတွေရဲ့ အသက်ဟာ အင်မတန်တန်ဖိုး ရှိတဲ့အတွက် ဒီတော်လှန်ရေးကို အတူတကွဆင်နွှဲနေတဲ့ ကျနော်တို့ရဲ့ မဟာမိတ် EAO တွေ PDF တွေအကျအဆုံးနဲအောင် ကာကွယ်ရေးဝန်ကြီးဌာန က တိုင်းရင်းသားလက်နက်ကိုင် အဖွဲ့တွေရဲ့ ခေါင်းဆောင်တွေနဲ့ အတူတကွညှိနှိုင်းပြီး စနစ်တကျစီမံပေးဖို့တိုက်တွန်းလိုတယ်လို့ သူကပြောဆိုခဲ့ပါသေးတယ်။
အကြမ်းဖက် စစ်ကောင်စီရဲ့ အဆိုးဆုံး ယုတ်မာမှုတွေကို ပြည်သူတွေခံစား နေကြရတယ်လို့ သူက ပြောပါတယ်။