ရန်ကုန်၊ ဇွန် (၇)
စစ်ကောင်စီက မကွေးတိုင်းဒေသကြီး၊ ယောဒေသ၊ စင်းစယ်ကျေးရွာ ကို ဒုတိယအကြမိမ်မြောက် လာရောက်ပြီး လူနေအိမ် (၁၂) လုံးကို မနေ့က မီးရှို့ဖျက်ဆီးခဲ့တယ်လို့ ယောဒေသပြည်သူ့ကာကွယ်ရေးတပ်ပေါင်းစု က ဒီနေ့ မနက်ပိုင်းမှာ ပြောပါတယ်။
“မီးရှို့ဖျက်ဆီးခံရမှုတွင် စင်းစယ်ကျေးရွာမှ လူနေအိမ် (၁၂)အိမ် မီးလောင်ပျက်စီးခဲ့ပြီး စပါးတင်းရေ (၅၀၀) ကျော် သိုလှောင်ထားသော လူနေတဲ (၁) လုံးလဲ ပါဝင်သွားခဲ့” တယ်လို့ သူတို့အဖွဲ့က ရေးသားထားပါတယ်။
Photo- YRPA (စစ်ကောင်စီက မီးရှို့ဖျက်ဆီးပြီးနောက် မြင်တွေ့ရတဲ့ လူနေအိမ်တချို့)
စစ်ကောင်စီကား (၂) စီးဟာ မနေ့ နေ့လည်က ကျေးရွာကို အတွင်းဝင်ရောက်ပြီး လူနေအိမ်တွေက စားနပ်ရိက္ခာ ပစ္စည်းတွေ ယူဆောင်တာ၊ လူနေတဲတွေကို လက်နက်ကြီးတွေနဲ့ ထုကြီး မီးရှို့ဖျက်ဆီးတာတွေ ပြုလုပ်ပြီးတဲ့နောက်မှာ ကျေးရွာအတွင်းက ပြန်လည်ထွက်သွားခဲ့တာ ဖြစ်တယ်လို့ ကျေးရွာသားတွေရဲ့ ပြောပြချက်ကို သူတို့အဖွဲ့ရဲ့ ထုတ်ပြန်ချက်မှာ ထည့်သွင်းဖော်ပြထားပါတယ်။
Photo- YRPA (စစ်ကောင်စီက မီးရှို့ဖျက်ဆီးပြီးနောက် မြင်တွေ့ရတဲ့ လူနေအိမ်တချို့)
“မိဘပြည်သူများ ဘေးကင်းလုံခြုံမှု့အတွက် YRPA မှ တတ်နိူင်သမျှကြိုးစားကာကွယ်သွားပါမည်။
ပြည်သူများ၏အသက်အိုးအိမ်စည်းစိမ်ကို ထိပါးနှောင့်ယှက်ဖျက်ဆီးနေသော စခများကိုလည်း အသက်ရှင်နေသမျှကာလပတ်လုံး အစွမ်းကုန်တိုက်ခိုက်နှိမ်နင်းသွားမည်ဟု ကတိပြုပါ” တယ်လို့ ယောဒေသပြည်သူ့ကာကွယ်ရေးတပ်ပေါင်းစု ရဲ့ သတင်းပြန်ကြားရေး က ပြောပါတယ်။
Photo- YRPA (စစ်ကောင်စီက မီးရှို့ဖျက်ဆီးပြီးနောက် မြင်တွေ့ရတဲ့ လူနေအိမ်တချို့)
စစ်ကောင်စီတပ်ဖွဲ့ဝင်တွေဟာ ဇွန်လ (၅) ရက်နေ့ကလည်း စစ်ကိုင်းတိုင်းဒေသကြီး၊ ချောင်းဦးမြို့နယ်၊ တပါယ်အင်းရွာ က လူနေအိမ်တွေကို မီးရှို့ဖျက်ဆီးခဲ့လို့ အိမ်ခြေ (၆၀) ကျော် မီးလောင် ပျက်စီးခဲ့ရတယ်လို့ Yinmarbin Local People’s Defence Force ရဲ့ ထုတ်ပြန်ချက်အရ သိရပါတယ်။