ရန်ကုန်၊ဇွန် (၂၂)

မီတာခကောက်ပြီး ပြန်လာတဲ့ မြင်းခြံမြို့နယ် EPC ရုံး က ဒုတိယလက်ထောက်ကြီးကြပ်ရေးမှူး ဦးတင်ကို နဲ့ ဦးမျိုးဇော်ဝင်း သေနတ်နဲ့ ပစ်သတ်ခံရလို့ သေဆုံးသွားတယ်လို့ မြို့ခံတွေဆီက သိရပါတယ်။

မနေ့ ညနေပိုင်းက မန္တလေးတိုင်းဒေသကြီး၊ မြင်းခြံမြို့နယ်၊ နှပ်ချိုတောကျေးရွာအနီးမှာ မီတာခများကောက်ခံပြီး ပြန်လာတဲ့ ဒုလက်ထောက်ကြီးကြပ်ရေးမှူး နှစ်ဦးကို အမည်မသိ သေနတ်ကိုင်ဆောင်ထားသူတွေက သေနတ်နဲ့ ပစ်သတ်ခဲ့လို့ သေဆုံးခဲ့တာပါ။

“EPC ရုံးက အကြီးတန်းတွေလေ သူတို့ကိုယ်တိုင် ရွာတွေကို ပါဝါလာပြတာ မဆောင်မဖြစ် ဆောင်ကြရတယ် တချို့ကလည်း စစ်တပ်ကို ခေါ်လာမှာစိုးလို့ ကြောက်ပြီးဆောင်တာ”လို့ မြို့ခံတစ်ဦးက C8News ကို ပြောပြပါတယ်။

ဒုလက်ထောက်ကြီးကြပ်ရေးမှူး ဦးတင်ကို နဲ့ ဦးမျိုးဇော်ဝင်း တို့ဟာ မီတာကြေးခတွေ ကောက်ခံပြီးအပြန် လမ်းမှာ သေနတ်နဲ့ ပစ်သတ်ခံခဲ့ရတာ ဖြစ်တယ်လို့ အုပ်ချုပ်ရေးနဲ့ နီးစပ်သူတစ်ဦးက C8 News ကို အတည်ပြုဖြေကြားပါတယ်။

“သေနတ်နဲ့ ပစ်ထားတာ ၁၇ ချက်လောက်ရှိတယ်။မီတာစာရွက်တွေ ပြန့်ကျဲနေလို့ လိုက်ကောက်ကသေးရတယ်။ ပွဲချင်းပြီးပါပဲ။ သွားကောက်တဲ့ မီတာခတွေပါ သေနတ်သမားတွေက ယူသွားတယ်။ သေလဲသေ ပိုက်ဆံလည်းဆုံး။” လို့ သူက ပြောပါတယ်။

ဇွန်လ (၁၅) ရက် ညနေပိုင်းက စစ်ကိုင်းတိုင်းဒေသကြီး၊ မုံရွာမြို့နယ်၊ စက်မှုဇုန်ထဲမှာ မီတာမဆောင်လို့ မီတာပုံးတွေလိုက်ဖြုတ်တဲ့ EPC ရုံးလက်ထောက်ကြီးကြပ်ရေးမှူး သုံးဦး သေနတ်နဲ့ ပစ်ခံရလို့ ဆေးရုံတင်ခဲ့ရတဲ့ ဖြစ်စဉ်လည်း ရှိခဲ့ပါတယ်။

Nway Oo Maung