ရန်ကုန်၊ မတ် (၁၀)
ဒီနေ့ မနက် (၆) နာရီ ဝန်းကျင်က စတင်ကာ စစ်ကောင်စီတပ်တွေ တိုက်လေယာဉ်၊ ကင်းထောက်လေယာဉ်တွေနဲ့ ကယားပြည်နယ်၊ ဒီးမော့ဆိုမြို့နယ်၊ ဒေါငံကျေးရွာက ဘာသာရေး အဆောက်အဦးတွေကို ဗုံးကြဲတိုက်ခိုက်ခဲ့တယ်လို့ ပြည်သူ့ကာကွယ်ရေးတပ် – ဒီးမော့ဆိုမြို့နယ် က ပြောပါတယ်။
“အကြမ်းဖက်စစ်ကောင်စီတပ်သည် တိုက်ပွဲဖြစ်ပွားခဲ့ခြင်းမရှိဘဲ ဘာသာရေးအဆောက်အဦးကို ပစ်မှတ်ထားတိုက်ခိုက်ခြင်း၊ အရပ်သားပြည်သူကို ပစ်မှတ်ထားတိုက်ခိုက်ခြင်း လုပ်ရပ်သည် မိမိတို့အနေဖြင့် လုံးဝရှုံ့ချသည်။” လို့ သူတို့က ပြောကြားခဲ့ပါတယ်။
တိုက်လေယာဉ် (၁) စီး၊ ကင်းထောက်လေယာဉ် (၁) စီးနဲ့ (၈) ကြိမ်နီးပါး ဗုံးကြဲတိုက်ခိုက်ခံခဲ့ရလို့ ဘာသာရေး အဆောက်အဦး (၄) လုံးကျော် ပျက်စီးသွားခဲ့ပါတယ်။
Photo- DMO-PDF
မတ်လ (၈) ရက်နေ့ မနက် အစောပိုင်း (၂) နာရီ ဝန်းကျင်က စစ်ကောင်စီတပ်တွေဟာ တိုက်လေယာဉ်တစ်စီးနဲ့ အရပ်သားပြည်သူတွေကို ဗုံးကြဲတိုက်ခိုက်ခဲ့လို့ ကက်သလစ် ခရစ်ယာန် ဘုရားကျောင်း (၁) လုံးလည်း ထိမှန်ပျက်စီးခဲ့ပါသေးတယ်။
